Kancelari austriak Sebastian Kurz, sot ka qëndruar për vizitë zyrtare në Maqedoni, ndërsa gjatë ardhjes së tij është pritur në mënyrë solemne nga ana e përfaqësuesve qeveritare të Maqedonisë.

Por, ajo që ka rënë në sy të gazetarëve dhe opinionit është se në vend të flamurit të Austrisë përkrah atij të Maqedonisë, është ngritur flamuri i Letonisë, i cili është i ngjashëm me atë Austrisë, përcjell Telegrafi Maqedoni.

Sipas të pranishmëve gjatë ardhjes së Kurz, flamuri i vendosur ka qenë i Letonisë, ndërsa për këtë gabim është njoftuar edhe protokolli i Qeverisë së Maqedonisë, por akoma nuk ka reagim zyrtar.

Mirëpo kjo nuk është e gjitha që ndodhi gjatë vizitës së Sebastian Kurz. Në konferencën e përbashkët që ai kishte me Zoran Zaevin, pati probleme me përkthimet, ndërsa Kurz nuk hezitoi të këshillonte Qeverinë e Maqedonisë që është mirë të kenë përkthyes që dinë deri 15 gjuhë të huaja.